相信大家都喺公司book過會議室，通常都係喺outlook send meeting request時，在location 嗰行揀番間房，然後按send 就完成。
極其簡單既事，估唔到都會成為小劇場。話説一個平凡的上午，全公司的會議室都爆滿，公司某高層的神秘書突然衝入其中一間會議室，大聲質問另一個同事B “你做咩霸左我間房？！”，同事B當時正同應徵者進行面試，以免嚇親應徵者，同事B請神秘書出去會議室外先再討論：
同事B：我無霸你間房，我好肯定我係book左呢間房，你有無check清楚？
神秘書：無可能，我book左呢間房架，你去第2間房啦，一陣我老闆要開會
同事B爆嬲：我interview 緊，你失驚無神衝入黎，仲要趕我走？
神秘書：因為我book左房架嘛，你咪揾過第二間房interview囉
同事B：算啦，我唔想同你嘈，你揾另一間房俾我，咁我咪讓呢間房俾你囉
然後神秘書就直衝去第二間房，問另一個同事C係唔係已經用完嗰間房，其實同事C講緊電話都未收線，不過佢好好人咁讓左間房出黎，結果同事B都好好脾氣咁大房換細房，讓左間大房俾神秘書。以為事情告一段落，點知神秘書竟然走去搵IT，話個outlook壞左，佢明明book左房但係唔知點解個booking消失左，叫IT幫手整，仲叫IT換過第二個book房系統，話個outlook有bug。
呢個神秘書其實係慣犯，同樣既事差唔多每個星期都發生，不過通常d同事都怕左佢，費事理論。除此之外，有時唔覺意聽到佢講電話同d餐廳嘈，聲稱自己明明有幫老闆book枱食飯，點解話佢無book位，屈餐廳無mark低，叫餐廳一定要俾番張枱佢，同埋建議人地轉過個system🙄
文章由 八軒的豬肉丼 提供，如果你也在IT公司中工作，歡迎投稿IT公司社畜日記，一齊分享，一齊笑住捱❤️。