因爲支持環保，所以在簽署僱傭合約時，有好多IT公司的政策都話唔會影番份副本俾僱員，作為僱員其實好不安，都想要返副本，咁唔同IT公司既HR會點樣處理呢個要求呢？
🌈空氣型 – “唔好意思啊，公司政策係咁”
好明顯感覺到佢既OS係 “我知道其實應該俾個copy你既，但係我打工架咋，公司話要咁我都無辦法”。喺呢個時候，你可以同佢講 “不如你幫我問下你上司，我可唔可以影相留番個紀錄？”，通常最後個答案都係可以的。
呢個類型的HR經常處於空氣狀態，你好難揾到佢，但係佢搵你就會失驚無神出現。為人十分謙遜，你問佢乜嘢，佢都係笑笑口同你講“唔知喎”，深信不求有功但求無過，只想平平靜靜準時打卡收工。佢地係好好既聆聽者，通常佢地同好口密，同佢呻下工作壓力就最好。
🌈火藥型 – “呢個係公司政策，你唔鍾意可以唔番呢份工”
真係聽過有HR咁講！佢講到咁決絕，其實無野好講。不過都係好事，一間公司可以請個咁既HR，本身個文化都應該火藥味好重，未入門口你都已經中槍，反而令你及早理解間公司既文化。火藥型既HR成日都好似好勁咁，氣場巨大，唔知係壓力大定天生具備威嚴，通常都黑口黑面，一舉一動都貫徹公司方針，通常佢地最優先的都是公司和自己。
🌈煙花型 – “明白既明白既，你簽左先，我幫你問下，遲啲再覆你”
空氣型既HR都有機會咁講，但空氣型真係會覆番你，煙花型就只係敷衍住你，唔會再主動覆你。煙花型HR表面十分友善圓滑、八面玲瓏，成日掛住不失禮貌的微笑，一睇就知係醒目仔女，看似好關心每個人，其實收風先係目的。佢唔係唔明人間疾苦，但交功課更緊要，無野緊要得過自己KPI。
🌈濕度型 – “公司政策雖然係咁，但係你可以用電話影低佢留番個紀錄”
濕度型HR心裡明白公司有時係會訂啲離地既政策，但更明白打工仔啞忍的心態，大環境下仍然堅持己所不欲、勿施於人的原則，盡量平衡雙方既願望，喺公司內人緣好好。濕度型HR平時十分低調，默默在背後支持大家，存在感薄弱，卻總是在失去後，先顯得他們重要。
不幸地，呢類HR成日都成為磨心，可能因為一啲業務上的不公平安排令同事間、上司下屬間出現爭執，往往都會揾完全唔關事但有人緣既濕度型HR去斡旋。（呢度好想同各位高層講，安排培訓俾上司下屬改善溝通、爭執時作為第三者調和、處理員工投訴都係HR份內事，但係説服員工接受業務上的安排真係完全唔關HR事架！唔好以為總之關於 “員工”兩個字的事都推落HR度）
其實公司有任何政策，近乎大多數都係由高層 top down 決定，由HR負責發表，受歡迎的話高層個個衝出黎認頭，有怨氣的話高層就話係HR決定既，由HR去安撫善後執行。你遇過邊類HR? 如果你遇到好的HR，就要對佢地好啲啦。
八軒的豬肉丼 作為一個打雜，輾轉碌過唔同IT公司，見識過唔同工作，唔同荒唐趣事，唔同人種，甚至奇珍異獸。
文章由 八軒的豬肉丼 提供，如果你也在IT公司中工作，歡迎投稿《IT公司社畜日記》，一齊分享，一齊笑住捱❤️。