同Tech Team傾計，最近佢地有點煩惱。話說，我地公司成日都報tender (招標)，報tender 都係普通流程：sales收左份tender > tech team 評估我地有無能力做及估計成本 > 交俾sales定出價 > 我地有能力做又有錢賺既就報tender，做唔到或者無錢賺的話就不報。不過最近收左幾份tender，既唔係做唔到，又唔係無錢賺，但係都要忍痛唔報。
唔報全因Tech Team完全評估唔到我地有無能力做，因為完全睇唔明！即使動員公司全部technical 同事，即使是用中文/英文寫，都無人睇得明！究竟發生什麼事？
💣到底要求什麼軟件？
明明上一段寫要個會計系統，但係下一段就寫要個ERP系統，再下一段就寫要個餐廳自助點餐系統，但係個用家都係會計部，我地估會計部無理由要用餐廳自助點餐系統吧…
💣究竟要求On-premises 還是 Cloud Hosting?
整份文件都在說客戶打算將軟件放在自己server room，並由自家IT團隊負責管理，但又附上一份必需履行的Cloud Hosting SLA (雲端服務水平協議)，兩者需要供應商投入的服務差太遠了…
💣網絡安全規格真的需要咁高？
網絡安全當然重要，但一個內部使用的系統真的需要國防級的規格嗎？造價是一個問題，影響軟件效能而不能符合軟件速度要求又是另一個問題。正等於任何文件放在銀行保險箱就好安全，但要付額外費用，要用到的話次次都要落銀行拎就好花時間。
睇完份tender，我地都幾乎肯定份tender係用AI generate出來之後直接招標。無奈之下，我地只可以選擇唔入標，而我地梗係唔可以直接同客戶講因為佢份tender寫得好爛，所以唔報啦！唯有求其作個原因。我地真係好想同以前一樣，認真根據客戶的要求估好每一個project的價錢，做好每個project，但係如果遇多幾份如此耐人尋味的tender，恐怕我地要放棄繼續認真了。
八軒的豬肉丼 作為一個打雜，輾轉碌過唔同IT公司，見識過唔同工作，唔同荒唐趣事，唔同人種，甚至奇珍異獸。 文章由 八軒的豬肉丼 提供，如果你也在IT公司中工作，歡迎投稿《IT公司社畜日記》，一齊分享，一齊笑住捱❤️。